Il-Logħob Tradizzjonali Malti

L-għan ewlieni ta' din il-WebQuest huwa sabiex intom tkunu tistgħu tieħdu idea aktar ċara ta' x'tip ta' logħob tradizzjonali Malti jeżisti, kif ukoll issiru konxji tal-influwenzi soċjali li ħalla dan il-logħob fuq il-kultura Maltija. B'dan il-mod intom ukoll għandkom aċċess għal informazzjoni dwar xi wħud mil-logħbiet tradizzjonali Maltin l-aktar popolari mat-tfal, kif ukoll sa ssibu numru sostanzjali ta' riżorsi li sa jgħinukom tifhmu aktar dan is-suġġett.

Ir-riżorsi li sa ssibu f'din il-WebQuest jinkludu vidjows dwar il-logħob li sa nittrattaw flimkien fil-klassi, stampi ta' xi wħud mil-logħbiet tradizzjonali Maltin, u xi noti mehmużin. Dan kollu jista' jkun ta' għajnuna għalik u għal sħabek sabiex tkabbru l-għarfien tagħkom tas-suġġett, għax wara kollox dak kollu li jsawwar il-kultura Maltija, huwa wkoll dak li jagħmilna Maltin.